Siglir tar il cuntegn

Header

cuntegn

Exteriur Nepal: situaziun precara pervi da l'enviern

Il Nepal sa chatta en il Himalaya, entamez las pli autas muntognas dal mund. Uss è l’enviern arrivà, cun naiv e temperaturas da minus. Bleras persunas ch’avevan pers lur chasas l’avrigl passà pervi dal terratrembel èn exponidas al fraid senza protecziun.

Suenter il grond terratrembel en il Nepal da l'avrigl passà han ils survivents da cumbatter cun il fraid da l'enviern.

L'emna passada èn gia 7 persunas mortas pervi dal fraid en il vitg Thokarpa. Quai rapporta la gasetta nepalaisa Kantipur. Bleras persunas che vivan en baraccas da tola ondulada sajan malsaunas.

Il terratrembel da l’avrigl ha gì ina fermezza da 7,8. Passa 9'000 persunas avevan pers lur vita, milliuns da persunas eran senza tetg.

Agid e reconstrucziun s’avanzan fitg plaun

En il pajais fitg pover s’avanza la reconstrucziun be fitg plaun. Ils meds finanzials da l’exteriur na cuntanschan betg ils pertutgads. E la bloccada politica dals cunfins cun l’India cumplitgescha il transport da raubas. Uschia mancan materialias da construcziun, benzin e gas per cuschinar.

In pur durant sia lavur.
Legenda: Dapli che 200'000 famiglias n'avevan nagin suttetg cura che l'enviern è arrivà. Keystone

Gia il november aveva l’organisaziun per l’agid d’uffants UNICEF avertì, che dapli che trais milliuns uffants nepalais sajan periclitads. Pervi da la bloccada dals cunfins na dettia quai nagins vaccins cunter la tuberculosa e las reservas d’antibiotica sajan extrem pitschens.

Dispita pervi da nova constituziun

Pervi da la mancanza da benzin na pon las organisaziuns d’agid strusch reparter mangiativas e cuvertas en las regiuns pertutgadas dal terratrembel. L’ONU aveva appellà a tuttas partidas da revocar la bloccada; fin uss senza success.

Tar la dispita vai per la nova constituziun dal Nepal. Tschertas gruppas da la populaziun en il sid dal pajais vesan en quella in dischavantatg e fan perquai protesta, per part violentamain.

RR novitads 18:00

Artitgels legids il pli savens