Vegnida ensemen cun il prinzi Andrew saja ella entras il delinquent sexual Jeffrey Epstein ch'è entant mort. Las inculpaziuns eran vegnidas enconuschentas avant dus onns. Il prinzi Andrew aveva lura refusà quellas renfatschas envers l'emettur britannic BBC.
Jeffrey Epstein era in investmentbanker. Il 2019 è el vegnì accusà perquai ch'el ha manà in rintg per explotar minorens a moda sexuala. Durant las preparaziuns per il cas da dretgira è el mort en praschun: Tenor il rapport da l'obducziun èsi stà suicidi.
En ils Stadis Unids ha ses mortori chaschunà in scandal da giustia, suandà da la teoria ch'el saja vegnì mazzà per betg pudair tradir tgi ch'era tut part dal rintg.
Il prinzi Andrew è stà pliras giadas giast tar Epstein en ils Stadis Unids ed er en la Caribica. Da quai che Epstein e sia ex partenaria Ghislaine Maxwell, che spetga entant en praschun sin ses process, han fatg n'haja el savì nagut.
Andrew ha bain declerà da vulair gidar cun las investigaziuns, n'è dentant anc adina betg s'exprimì davant la procura publica da New York. Malgrà pliras dumondas. Andrew è vegnì l'ultim temp adina pli fitg sut squitsch er en Gronda Britannia pervi dal scandal enturn Epstein. Perquai ha el dà giu tuttas incumbensas sco royal e n'è strusch pli sa mussà en la publicitad.
