Siglir tar il cuntegn
Inhalt

Exteriur Nizza: terza unfrenda svizra

Il dumber da las persunas svizras - ch'èn mortas en consequenza da l'attatga a Nizza crescha. Era la mamma da la buoba d'Yverdon-les-Bains ch'è morta a Nizza saja morta tar l'attatga.

La promenade des Anglais a Nizza. sin via giaschan dapertut glischs da tee ed autras chandailas. davostiers blera glieud che stat sin la via. igl è notg.
Legenda: Chandailas per ils morts a la promenade des Anglais. Keystone

Sco quai ch'il chantun Vad ha communitgà, hajan las autoritads federalas confermà la mort da la dunna. Era ina dunna dal Tessin era vegnida per la vita tar l'attatga a Nizza gievgia passada.

En tut eran mortas passa 80 persunas.

L'attatga

L'um franzos cun ragischs tunesianas era charrà la notg sin sonda cun in camiun en ina fulla da persunas sin la promenada da Nizza. Passa 80 persunas èn vegnidas per la vita e passa 200 blessadas. Ils motivs da l'attentat n'èn però anc betg clers. Actualmain èn anc adina 18 persunas en privel da vita.

En Frantscha vala a partir da sonda ina malencurada naziunala da trais dis.

Arrestà sis persunas

La polizia franzosa ha arrestà quatter ummens che stevan datiers a l'attentader, uschia l'agentura da novitads franzosa AFP. La ex dunna da l'attentader saja anc adina en arrest. Ella era vegnida arrestada gia venderdi.

Dumengia èn vegnidas arrestadas duas ulteriuras persunas, in um ed ina dunna. Quai rapporta l'agentura da novitads AFP sa referind sin la giustia.

RR novitads 10:00