Nov schlantsch per Air Berlin – grazia a la Lufthansa

La societad aviatica Lufthansa cumpra grondas parts da l'Air Berlin. Il contract da cumpra vegnia suttascrit il decurs dal di. Quai ha annunzià il schef da la Lufthansa Carsten Spohr a Berlin.

In aviun dad Air Berlin ed in da la Lufthansa. Bild in Lightbox öffnen.

Legenda da maletgs: Nov schlantsch: La Lufthansa surpiglia probablamain 81 aviuns e 3’000 collavuraturas e collavuraturs da l'Air Berlin. Keystone

Il schef da la Lufthansa Carsten Spohr discurra dad in grond di per omaduas societads aviaticas. Spohr vegnia a suttascriver il contract correspundent la gievgia a mezdi a Berlin, vegn il schef da la Lufthansa cità da l’agentura da novitads svizra SDA. Spohr è persvadì, che sia cumpra survegn anc quest onn er l’autorisaziun da l’UE.

81 da 144 aviuns e 3'000 da 8'500 collavuraturs

La Lufthansa surpiglia probablamain 81 aviuns e 3’000 collavuraturas e collavuraturs d’Air Berlin. Per quest intent veglia la societad aviatica investir 1,5 milliardas euros.

Actualmain ha Air Berlin 144 aviuns ed occupescha 8’500 collavuraturs. Ella è fin uss stada la segund gronda societad aviatica tudestga. Avant dus mais era ella sa declerada insolventa. Il traffic aviatic po dapi lura mo vegnir garantì grazia ad in credit dal stadi sur 150 milliuns euros.

Co vinavant cun tschellas parts n'è betg anc enconuschent

Anc betg enconuschent è, tge che succeda cun las parts dad Air Berlin, che na van betg tar Lufthansa. Sch'i dat la gievgia ina cunvegna tranter Air Berlin ed EasyJet n'è betg anc cler. Cler è dentant, che Air Berlin contracteschia la gievgia vinavant cun Easy Jet, citescha l'agentura da novitads tudestga DPA in pledader dad Air Berlin.

RR novitads 10:00