Siglir tar il cuntegn

Header

Navigaziun

cuntegn

Exteriur Nova concurrenza per Sarkozy

En la cursa per la candidatura presidiala dals conservativs en Frantscha ha l’anteriur president Nicolas Sarkozy survegnì in nov rival. Jean-François Copé, l’anteriur schef da la partida conservativa UMP (oz «Les Républicains»), ha annunzià sia candidatura per las elecziuns primaras il november.

Jean-François Copé (san.) e Nicolas Sarkozy (dre.).
Legenda: In ha candidà, l'auter anc betg. Jean-François Copé (san.) e Nicolas Sarkozy (dre.). Keystone

En Frantscha candidescha in ulteriur politicher conservativ per la presidenza. Jean-François Copé ha ditg ch'el veglia sa preschentar a las elecziuns primaras dals republicans il november che vegn.

Anc nagina candidtura ufficiala da Sarkozy

Entant n’ha Nicolas Sarkozy, il schef da la partida dals republicans, betg candidà uffizialmain fin uss. I vala dentant sco secret avert, ch’el ha prendì en mira la reconquista da l’uffizi, il qual el aveva pers il 2012 al socialist François Hollande.

Copé avevan stuì sa retrair da ses post sco schef da partida da l’UMP avant 20 mais pervi d’afferas finanzialas. Suenter ina greva crisa da la partida era lura Sarkozy vegnì elegì a la testa da l’UMP. Il matg 2015 ha la UMP – sin giavisch da Sarkozy – survegnì in auter num, «Les Républicains».

Tar ils republicans ha però actualmain insatgi auter las meglras schanzas: l'ex prim-minister Alain Juppé è tenor retschertgas a la testa.

RR novitads 07:00