Puspè fa ina scuverta da firmas offshore lingias grassas en l'entir mund: ils uschenumnads «Paradise Papers». Publitgà ella ha ina gruppa internaziunala da schurnalists investigativs. I sa tracta da la medema organisaziun ch'ha scuvert ils «Panama Papers» l'avrigl 2016. Tgi ch'ha haccà questas datas, n'è dentant anc betg enconuschent.
Questa scuverta porta passa 13 milliuns documents u 1,4 terabyte datas, cunzunt da la chanzlia d'advocats internaziunala Appleby. Questa chanzlia ha sia sedia sin las Bermudas.
Concerns svizzers involvids
Era almain trais firmas da materia prima cun sedia en Svizra vegnan numnadas, tranter quellas la pli gronda da talas firmas, numnadamain Glencore. A la glisch vegnan transacziuns en pajais da l’Africa ed autras regiuns, nua ch’ì dat surtut gronda corrupziun, scrivan las agenturas da novitads.
En ils documents chattan ins era ils nums da 120 politichers ord 50 pajais, e dad interprendiders e sportists. Ils «Paradise Papers» furneschan nov material en l'entira discussiun da corrupziun e fraud fiscal. La dumonda suenter reglas pli severas internaziunalas e suenter dapli transparenza tar constructs offshore è danovamain lantschada.
RR 21:00+
