Nova regenza en Austria - Sebastian Kurz è pront per contrahar cun Verds

• La partida conservativa ÖVP ed ils Verds cumenzan a manar discurs da coaliziun.

• Ils Verds avevan gia declerà la dumengia d'esser pront per discurs da talas tractativas.

En l'Austria vul la partida conservativa ÖVP manar discurs da coaliziun cun ils Verds. Suenter ch'ils discurs da sondagi èn ids a fin il venderdi ed er suenter lungas discussiuns entaifer la partida, saja la ÖVP sa decidida unanimamain a quest pass. Quai ha ditg l'anteriur chancelier Sebastian Kurz.

Questas tractativas na vegnan betg ad esser simplas, cunquai che las posiziuns dals Verds e da la ÖVP èn fitg differentas.

Ina «ristga»

Ils Verds da lur vart avevan dà la dumengia glisch verda ad ina coaliziun pussibla. Il schef dals Verds Werner Kogler aveva lura ditg ch'ina tala coaliziun saja ina «ristga» ch'ins veglia prender.

Sin stgalim naziunal fiss ina participaziun dals Verds ina premiera. Ils proxims dis veglian els fixar las cundiziuns da basa per ils discurs da coaliziun, uschia Kurz. La fin da settember aveva la ÖVP gudagnà cleramain las elecziuns parlamentaras anticipadas.

audio

Per tadlar: Las novitads da las 12:00

05:23 min, ord Novitads dals 11.11.2019.

laschar ir. Durada: 5 minutas 23 Secundas.

RR novitads 12:00