En il Canada ha in um sajettà giu numerusas persunas durant in amoc – tranter auter er ina policista. L'um da 51 onns haja mazzà almain 16 persunas ord in auto che veseva ora sc'in vehichel da polizia - annunzia la polizia canadaisa. L'amoc saja capità en plirs lieus d'ina citad pitschna en la provinza Nova Scozia ed haja durà 12 uras.
Tenor la polizia è l'um mort. Ses motiv n'è betg cler. Ils indizis laschian supponer che l'um haja planisà l'attatga, ma ch'el haja er mazzà persunas ch'el na enconuscheva betg. Il primminister canadais ha discurrì la dumengia saira d'in act da violenza absurd.