Siglir tar il cuntegn

Header

Purtret da demonstrants che tegnan parasols entamaun, visavi ad els stattan duas colonnas da polizists e quai amez la citad da Hongkong.
Legenda: La polizia stat visavi als demonstrants ch'emprovan da sa proteger cun parasols cunter il mender. Keystone
cuntegn

Nova unda da violenza Polizia a Hongkong ha sajettà sin in demonstrant

A Hongkong hai danovamain dà grevas confruntaziuns tranter la polizia ed ils demonstrants. La polizia ha sajettà ad in um mascrà da davant en il corp sura. Sco las autoritads da l'ospital communitgeschan, sa chattia l'um da 21 onns en in stadi critic.

L'um blessà è gia il terz demonstrant ch'è vegnì blessà entras sajets da la polizia. Sin in video che cursescha en las medias socialas è da vesair, co in policist drizza sia arma ord curta distanza sin demonstrant. Lura datti ina scagnada. Cura ch'in ulteriur demonstrant s'avischina da la vart sajetta il policist sin quai. Suenter ha el anc sajettà duas ulteriuras giadas en direcziun dals demonstrants.

Video
Policist sajetta sin in demonstrant
Or da News-Clip dals 11.11.2019.
laschar ir

La polizia ha confermà l'incident ed ha era declerà che dus ulteriurs policists en in'autra part da la citad hajan stuì trair lur armas, pervi da las acziuns radicalas dals demonstrants.

Las demonstraziuns per dapli democrazia a Hongkong, che vegn regì a moda autonoma, duran gia dapi il zercladur.

Pertge vegn demonstrà?

Personen-Box aufklappenPersonen-Box zuklappen

Ils 9 da zercladur hai dà las emprimas escalaziuns. Ils demonstrants protestan che Peking ha adina dapli influenza sin l'anteriura colonia britannica.

Raschun per las protestas eran ils plans cuntravers da la scheffa da regenza per ina nova lescha d'extradiziun. Cun questa lescha avessan er persunas che vegnan suspectadas dal sistem giuridic chinais stuì vegnir extradidas a la China. La regenza ha entant sutterrà la lescha.

Ils demonstrants cumbattan dentant vinavant per elecziuns libras, che cas da brutalitad da la polizia vegnian examinads a moda independenta sco era per la libertad da passa 2'000 arrestads. Els vulan er che la scheffa da regenza Lam sa retiria.

RR novitads 06:00