En la Nova Zelanda ston 150'000 vatgas vegnir mazzadas. Quai pervi d’ina malsogna contagiusa. La primministra Jacinda Ardern ha declerà oz in plan correspundent per ils proxims dus onns. La regenza, l’industria agrara ed experts han tractà durant mais ed elavurà questas mesiras. I saja grev e nagin veglia mazzar en massa. Il ristg ch'il scherm infectus da la malsogna, il mycoplasma bovis, sa derasia vinavant, saja dentant memia grond, ha argumentà Ardern.
Il mycoplasma bovis è enconuschent dapi ils onns 1980. En la Nova Zelanda han ins chattà il fanadur dal 2017 l'emprim cas en in manaschi da latg sin la insla dal sid. Entant èn 37 manaschis pertutgads da la malsogna.
Tut en tut datti en la Nova Zelanda 10 milliuns vatgas. Il pajais exportescha il pli bler latg dal mund. 90% da la producziun vegn exportada.
RR novitads 09:00