Il mument da l'erupziun dal vulcan Whakaari en la Nova Zelanda eran tenor la polizia 47 persunas sin l'insla White Island. Tranter questas 4 persunas da la Germania. 31 persunas sajan vegnidas blessadas, 27 hajan grevas arsentadas da passa 70% da la surfatscha da pel. Sco quai che la regenza communitgescha na survivian probabel betg tuts questas grevas blessuras. Fin uss ha il vulcan chaschunà 5 morts. Almain 8 persunas èn anc sparidas.
La polizia na quinta betg cun survivents ed ha entant cumenzà cun investigaziuns davart il decurs da la catastrofa. La primministra dal pajais, Jacinda Ardern, aveva gia annunzià en il parlament, ch'ins vegnia a stuair sa dumandar sche tut las prescripziuns da segirezza sajan vegnidas respectadas.
RTR novitads 07:00