Siglir tar il cuntegn

Header

Navigaziun

Purtret da Jacinda Ardern.
Legenda: La primministra da la Nova Zelanda, Jacinda Ardern vul realisar tant pli spert il scumond definitiv per armas mez-automaticas e buis d'assagl. Reuters
cuntegn

Exteriur Nova Zelanda scumonda buis d'assagl ed armas mez automaticas

La lescha d'armas pli severa vegn relaschada sco reacziun sin l'attentat da Christchurch, ha ditg la primministra Jacinda Ardern. Ina legislaziun correspundenta entras il parlament succedia anc.

Il scumond immediat da buis d'assagl ed armas mez-automaticas, duaja impedir ch'i vegnia rimnà talas armas. La regenza elavuria plinavant in plan per cumprar giu armas en possess privat dals burgais. Il venderdi aveva in extremist da dretga sajettà enturn en duas moscheas e mazzà 50 persunas.

Tempo enorm

Jacinda Ardern metta nà in tempo enorm svelt per realisar il scumond da las armas. Gist suenter l'attentat aveva ella annunzià da vulair rinforzar la lescha d'armas en Nova Zelanda. Quai è dentant vegnì spetgà pir pli tard. Cun questa reacziun sin las armas fa Ardern ina cumplet autra politica che per exempel ils Stadis Unids. Là vegn adina be discutà davart leschas pli severas suenter talas attatgas.

En Nova Zelanda hai radund 1,2 milliuns armas. Quantas da quellas ch'èn mez-automaticas, n'è betg cler. Tgi che posseda ina tal'arma sto ussa dentant dar giu quella. I duai dentant dar in'indemnisaziun dal stadi. Glieud che ha cumprà uschè in'arma a moda illegala e returna ella duai profitar d'ina amnestia.

RR novitads 06:00