L’Uniun europeica ha mess en vigur sco planisà las ulteriuras sancziuns pervi dal conflict en l’Ucraina. Concret èn quai bloccadas da contos e scumonds da viagiar cunter 19 burgais russ ed ucranais.
Pertutgads èn tranter auter er dus vice-ministers da defensiun e dus deputads russ. Sin la glista sajan plinavant represchentants dal militar da las regiuns Donezk e Lugansk. La raschun per las ulteriuras sancziuns è stada l'attatga da rachetas sin la citad Mariupol la fin da schaner. Quatras eran mortas 30 persunas.
Spustà il termin pervi da discurs da pasch a Minsk
Avant in'emna avevan ils ministers da l'exteriur da l'UE decis da spustar las sancziuns per in'emna pervi da las tractativas da pasch a Minsk. Là eran las partidas da conflict da cunvegnidas ad in armistizi, en l'UE regia dentant gronda skeptica schebain quella vegn er respectada.
151 Russ ed Ucranais sa chattan entant sin la glista
Sin la glista da sancziuns da l'UE stattan ussa 151 Russ ed Ucranais sco er 37 organisaziuns ed interpresas. Ad ellas vegn rinfatschà da betg respectar la suveranitad e l'integritad territoriala en l'Ucraina. La fin da schaner era la validitad da questa glista gia vegnida prolungada sin la fin da settember.
RR novitads 15:00