Siglir tar il cuntegn

Header

cuntegn

Exteriur Novas tensiuns tranter Albanais dal Cosova e la Serbia

Tozzels d'Albanais han bloccà la via cun camiuns e chavaterras per impedir la visita dal president serb Aleksandar Vucic. Sin quai ha la regenza cosovara stritgà la visita da Vucic per raschuns da segirtad.

Il president serb Aleksandar Vucic era rivà sonda per ina visita da la minoritad cosovara. Quai cun la lubientscha explicita da la regenza cosovara – suenter squitsch dals Stadis Unids e da l'Uniun europeica. Malgrà che la regenza cosovara aveva suenter ils incaps retratg la lubientscha, era Vucic sa mess sin via da Mitrovica en direcziun dal vitg serb Banje (regiun Skenderaj), en il vest da Pristina.

Nagina «schliaziun sperta»

Il president serb na vesa strusch schanzas per ina schliaziun sperta dal cunflict. In cumpromiss saja «quasi nunpussaivel», ziteschan medias serbas il president Vucic. Da l'autra vart èn ils Stadis Unids e l'Uniun europeica che vulan far ils proxims mais pass decisivs per schliar il cunflict permanent.

Nagina autonomia, però sustegnair la minoritad cosovara

Venderdi aveva ina ulteriura runda d'intermediaziun da l'UE tranter ils stadis en dispita fatg naufragi. Il president serb Aleksandar Vucic aveva refusà da s'inscuntrar cun il president dal Cosovo Hashim Thaci, ed era puspè partì da Brüssel. Vucic è però sa mussà pront da procurar per creschientscha economica e sustegnair la minoritad cosovara.

Regiun cun cumbats durant decennis

La fin dals onns 90 aveva il militar serb chatschà davent fin 800'000 Albanais or dal Cosovo - quai per avair la controlla da la regiun. Pir sin intervenziun da la Nato eran ils Serbs puspè sa retratgs. Dapi lura è il Cosovo sut administraziun internaziunala sut la protecziun da truppas manadas da la Nato. Il 2008 era il Cosovo lura sa declerà sco independent ed è fin ussa renconuschì sco stadi autonom da radund 110 auters stadis. La Serbia ha mai acceptà quai.

RR novitads 12:00

Artitgels legids il pli savens