Il servetsch secret american NSA duai avair spiunà ora intenziunadamain 3 presidents franzos e represchentants da la regenza, quai rapportan medias europeicas sa referind sin documents che la plattafurma da scuverta Wikileaks ha publitgà.
Ils documents sajan classifitgads sco "absolutamain secrets". I sa tractia da resumaziuns da discurs or dal circul dal president François Hollande però er da tals da ses dus antecessurs Nicolas Sarkozy e Jacques Chirac. La regenza americana n'ha betg vulì commentar questas inculpaziuns envers il servetsch secret.
