Siglir tar il cuntegn

Header

cuntegn

Exteriur «Nunponderà» - critica a regenza britannica per la guerra en Irac

Ina cumissiun britannica tar la guerra en l’Irac crititga la rolla da la regenza dal primminister Tony Blair. Da sa participar a l’invasiun americana l’onn 2003 saja stà «nunponderà».

L’invasiun en l’Irac dal 2003

Avrir la box Serrar la box
Legenda: Keystone

L'invasiun era vegnida fatga senza mandat cler dal l'ONU. Perquai era ella vegnida crititgada fermamain. Armas da destrucziun da massa en possess dal dictatur Saddam Hussein n’èn mai vegnidas chattadas. En il conflict eran entretschads fin a 46’000 schuldads britannics. Durant e suenter la guerra èn vegnids dieschmillis d’Iracais per la vita.

La cumissiun argumentescha che Toni Blair sa haja laschà sin infurmaziuns faussas da servetsch secrets. Quellas haja el preschentà sco pli cumprovantas che giustifitgà.

Sa laschà sin fuassas infurmaziuns

Uschia saja crudada la decisiun politica avant che tut las «opziuns paschaivlas per in discharmament» da l’Irac sut il dictatur Saddam Hussein sajan vegnidas nizzegiadas. Perquai concluda la cumissiun cun ses manader, John Chilcot, ch’i saja stà «nunponderà» da sa participar a l’invasiun manada dals Stadis Unids.

Plans «cumplettamain insuffizients»

Vinavant crititga la cumissiun, ch’ils plans per il temp suenter la guerra sajan stads «cumplettamain insuffizients». Malgrà quai haja Toni Blair empermess da sustegnair l’anteriur president american George W. Bush, independent da «tge che vegnia a capitar».

Tony Blair sa vesa distgargià tras il rapport

Il rapport fetschia ina fin cun tut las rinfatschas da «malvulientscha, manzegnas ed engion» scriva l’anteriur primminister en in’emprima reacziun. El haja decidì en buna fai e crajend ch’i saja il meglier per ses pajais dad intervegnir ensemen cun ils Stadis Unids militarmain encunter il dictatur Hussein.

El vegna a surprender la responsabladad cumplaina per tut ils sbagls, uschia Blair.

Cumissiun Chilcot ha lavurà 7 onns

La cumissiun ha lavurà 7 onns per il rapport. Ella ha intervistà pertutgads e gì access a documents secrets. Las indicaziuns dal servetsch secret, che l’Irac haja armas da destrucziun da massa avess stuì vegnir mess en dumonda, uschia Chilcot il mesemna a Londra.

RR novitads 14:00

Artitgels legids il pli savens