Siglir tar il cuntegn
Inhalt

Exteriur Obama condemnescha attatga a Baton Rouge

Il president american Barack Obama condemnescha l'attatga sin policists en la citad da Baton Rouge en la Lousiana. La segunda giada aifer duas emnas sajan policists vegnids mazzads durant ch'els hajan fatg lur lavur.

Il president american Barack Obama.
Legenda: Barack Obama: Ils Stadis Unids stoppian dir cleramain ch’i na dettia nagina giustificaziun per violenza cunter la polizia. Reuters

Ils schabetgs sajan attatgas faigas cunter il stadi da dretg e la populaziun civilisada, uschia Obama.

Trais policists moran tar sajettada a Baton Rouge

En la citad americana Baton Rouge en il stadi federativ american da Louisiana èn plirs poizists vegnids tutgads d'ina sajettada. Trais dad els en vegnids mazzads, in sa chatta anc en privel da vita.

In pledader da la polizia ha confermà ch'in delinquent saja vegnì mazzà. La polizia era l'emprim partida dal fatg ch'i haja dà plirs delinquents.

Pir avant 10 dis èn vegnids mazzads tschintg policists en la citad da Dallas.

Autos da polizia sin la via nua ch'i ha dà la sajettada.
Legenda: La polizia segirescha la via nua ch'i ha dà la sajettada. Reuters

Sajettà dus giuven nairs avant paucs dis

A Baton Rouge avev'in policist sajettà giu avant paucs dis in giuven nair. Il medem è capità a Minessota. Quai aveva chaschunà protestas. En numerusas citads eran sinaquai millis ids sin via per demonstrar cunter la violenza da la polizia.

I ha adina puspè dà tumults tranter policists e demonstrants. Sulettamain a Baton Rouge èn quasi 200 persunas vegnidas arrestadas.

RR novitads 18:00 / 18.07.2016 – 06:00