Siglir tar il cuntegn
Inhalt

Exteriur Obama crititgescha fermamain la regenza Trump

L'anteriur president american Barack Obama ha appellà als Americans da chastiar la regenza da ses successur Donald Trump tar las elecziuns intermediaras.

Barack Obama
Legenda: Obama appellescha als Americans da chastiar la regenza actuala da l'USA. Keystone

En in pled avant students ad Urbana-Champaign en il stadi federativ Illinois ha l’anteriur president american Barack Obama appellà als votants e las votantas da chastiar la regenza da ses successur Donald Trump tar las elecziuns intermediaras. Er tgi che na saja politicamain betg da ses avis, stoppia esser inquietà dal curs actual dals Stadis Unids, ha ditg Obama.

Trump saja in privel per la democrazia. Sinceradad, maniera e legitimitad en la regenza stoppian vegnir restabilids, ha pretendì Obama. En general ha el appellà a ses auditurs da dar giu lur vusch e da betg pensar ch'elecziuns na gioghian nagina rolla.

Tar las elecziuns il november vegn la chombra dals represchentants ed in terz dal senat elegì da nov. Las elecziuns valan sco impurtant barometer per la regenza dal Republican Trump. Il president actual sto temair, ch'ils Republicans perdian lur maioritad en la chasa da represchentants als Democrats.

RR novitads 06:00