Siglir tar il cuntegn

Header

cuntegn

Exteriur Obamacare duai restar – 18 stadis federativs van avant dretgira

Il president american Donald Trump vul stritgar in ulteriur element da basa dad Obamacare.

Plirs stadis federativs dals Stadis Unids van avant dretgira per proteger Obamacare. Il president american, Donald Trump, vul numnadamain stritgar in ulteriur element da basa da l'assicuranza.

En tut han 18 stadis federativs inoltrà venderdi a California in plant tar la dretgira federala, cunter il stop da pajar milliardas dal stadi als segirads. La regenza americana aveva la gievgia argumentà ch'i dettia nagin fundament giuridic per talas subvenziuns. D'in tal pajament profiteschian sulet las assicuranzas, ma betg la clientella, ha declerà Trump.

Senza subvenziun s'augmentassan las premias

Enfin uss ha il stadi pajà ils daners direct als segirads cun la finamira da distgargiar persunas cun pitschnas entradas. Quest onn muntass quest pajament a set milliardas dollars. Da stritgar quests daners pudess tenor experts manar ad in auzament massiv da las premias.

Quai è in'emprova da siglientar l'entir sistem.
Autur: Eric Schneiderman Minister da giustia New York

Ils stadis federativs che accusan, tranter auter New York, California e Massachusetts din che Trump na prendia nagin resguard cun sia decisiun.

Pliras emprovas han fatg naufragi

Ils republicans en il congress han malgrà lur maioritad gia pliras giadas fatg naufragi cun lur emprova da vulair stritgar Obamacare. Quella empermischun da bandischar Obamacare è stada ina da las empermischuns centralas da Trump durant il cumbat electoral. Uss emprovia Trump pia cun bajegiar enavos pass per pass Obamacare.

Deputads republicans avevan fatg plant cunter las substituziuns per il segirads cun la motivaziun che Obama haja cun quai surpassà sias cumpetenzas. Mo il congress possia lubir talas expensas da daners. Quest cas è dentant anc adina en lavur.

RR novitads 09:00

Artitgels legids il pli savens