Siglir tar il cuntegn

Exteriur Ollanda scumonda – la Tirchia vul tuttina

La Tirchia sa tegna vinavant vid sias occurenzas da cumbat electoral en l'Ollanda. Els giajan là nua ch'els veglian, ha ditg il minister da l'exteriur tirc ad Antalya.

Purtret da Mark Rutte.
Legenda: L'emprim minister da l'Ollanda Mark Rutte na vul nagins cumbats electorals d'auters pajais. Keystone

L'Ollanda ha scumandà ina preschentaziun da la regenza tirca a Rotterdam. L'argumentaziun da l'emprim minister, Mark Rutte è stada che l'Ollanda na saja betg il lieu per auters pajais da far lur cumbat electoral.

Avant avevan las autoritads Tircas annunzià ch'il minsiter da l'exteriur tirc Mevlut Cavosoglu tegnia ils 11 da mars in pled a Rotterdam. L'occurenza è stada planisada en connex cun ina votaziun en Tirchia che pertucca ina refurma da la Constituziun.

Vi da quai na vulain nus betg ans participar, quai n'è betg giavischaivel.
Autur: Mark RutteEmprim minister da l'Ollanda

Il minister da l'exteriur da la Tirchia, Mevlüt Cavusoglu n'ha gì nagin plaschair da quai. Els giajan Là nua ch'els veglian. El ha plinavant inculpà l'Ollanda d'ina morala dubla. El sa dumonda nua che la democrazia, las libertads, la libertad da l'opiniun sajan.

Er en Germania èn pliras occurenzas per il cumbat electoral da ministers Tircs vegnids ditg giu. Ils plans d'occurenza da politichers tircs en Germania han manà tar inquietezza en ils pajais federativs Baden-Württemberg e Nordrhein-Westfalen. En la chasa-cumin da Gaggenau hai dà ina smanatscha d'in attentat da bumbas suenter che l'occurenza cun il minister da giustia tirc Bekir Bozdag è vegnida ditga giu.

RR novitads 06:00