Las expensas militaras dals stadis han l’onn 2021 per l’emprima giada surpassà la marca da dus billiuns francs. Cumpareglià cun l’emprim onn da la pandemia sajan ellas s’augmentadas per 0,7% sin sur 2 billiuns francs. Quai resulta dal rapport da l’institut da retschertga da la pasch svedais «Sipri». Quai saja gia il settavel onn d'augmentaziun.
Investì il pli bler en l’armada hajan puspè ils Stadis Unids cun bunamain 770 milliardas francs. Tenor ils perscrutader da la pasch focusseschian ils Stadis Unids oravant tut sin il svilup da novas tecnologias. Sin il segund plaz suondia la China cun sur 280 milliardas francs. Cun gronda distanza suondian l'India, la Gronda Britannia e la Russia. En egl dettia vinavant che la Russia haja augmentà sias expensas militaras per 2,9% sin sur 63 milliardas francs avant l’invasiun en l’Ucraina.
