Siglir tar il cuntegn

Header

cuntegn

ONU Record da persunas basegnusas

Las Naziuns unidas quintan che dapli persunas dovrian agid umanitar l’auter onn. Ellas quintan cun 168 milliuns persunas basegnusas – pia mintga 45avla persuna dal mund.

Quai è uschè bleras persunas sco dapi la Segunda Guerra mundiala betg pli. Quai resulta d’ina analisa che l’ONU ha preschentà a Genevra. La situaziun vegnia anc mendra, sch’ins ignoreschia las consequenzas da la midada dal clima e las raschuns da conflicts – ha ditg il coordinatur da las Naziuns unidas Mark Lowcock. La ONU veglia sa concentrar sin l’agid per 109 milliuns umans en passa 50 pajais, en emprima lingia en il Jemen, la Siria nua ch’i regia guerras civilas, ma er en il Congo nua ch’il virus d’Ebola sa derasa.

Per pudair gidar a moda commensurada stoppian las Naziuns unidas impunder en tut 29 milliardas dollars. L’agid umanitar cumpiglia tranter auter victualias, alloschis, tractament medicinal e scolas provisoricas.

RTR novitads 11:00