La OPEC – l’organisaziun dals pajais ch’exporteschan ieli – aveva gia annunzià ch'ella veglia auzar ils pretschs d’ieli. Per far quai vegniva en dumonda in stop ubain ina limitaziun da la producziun d'ieli. Ils commembers da l'OPEC èn uss sa decidids per la segunda varianta. Il mument vala il dumber da maximalmain 33 milliuns butschins ieli a di. Quai èn bunamain 500'000 butschins pli pauc ch'anc l’avust passà.
La mesira ha gia fatg effect. Il pretsch per l’ieli è ì ad aut.
Avertiment avant l'inscunter
Il minister d'energia da l'Algeria, Noureddine Boutarfa aveva ditg avant l'inscunter ch'el na sappia betg pli garantir la furniziun dal martgà sch'il pretsch d'ieli stettia vinavant sut 50 dollars per barrel. I saja ina dumonda da la responsabladad da chattar ina cunvegna per evitar in ulteriur schoc per il martgà d'ieli.
Ils pretschs d’ieli èn sa reducids avant dus onns da 100 dollars sin 30 dollars per barrel. In barrel è radund 159 liters.
RR novitads 6:00