Siglir tar il cuntegn

Header

Navigaziun

Purtret da protestas a Venezuela. Ina dunna tegna enta maun in purtret da Maduro.
Legenda: Maduro vul novas elecziuns parlamentaras, l'opposiziun vul in nov president. Keystone
cuntegn

Exteriur Opposiziun a Venezuela na vul betg novas elecziuns

L’opposiziun a Venezuela refusescha novas elecziuns parlamentaras. La finamira saja vinavant la demissiun dal president Nicolas Maduro.

Novas elecziuns presidialas n'èn tenor il president, Nicolas Maduro nagin'opziun. El aveva dentant proponì elecziuns da parlament anticipadas. El sez veglia restar en uffizi enfin il 2025, uschia Maduro.

Guaidó cumbatta per metter giu Maduro

Il schef dal parlament e manader da l'opposiziun Juan Guaidó era sa declerà l'emna passada sco president transitoric da la Venezuela. El vegn tranter auter renconuschì dals Stadis Unids, il Canada e plirs stadis sidamericans. Plirs stadis europeics han dà peda a Maduro da fixar novas elecziuns fin la dumengia. Uschiglio vegnian er els a renconuscher Juan Guaidó sco president transitoric.

Ier aveva il Tribunal suprem a Caracas decis che Guaidó na dastgia betg bandunar il pajais. Plinavant ha il tribunal bloccà ses contos. Per sonda ha Juan Guaidó annunzià ulteriurs protests da l'opposiziun en l'entir pajais cunter la regenza da Nicolas Maduro.

RR novitads 06:00