Siglir tar il cuntegn

Header

Navigaziun

cuntegn

Exteriur Orascom cun cifras cotschnas

Il concern d'immobiglias e gestiunari d'hotels Orascom ha fatg bunamain in terz damain svieuta ils ultims 9 mais – quai cun stgars 170 milliuns francs. Sco quai ch’il concern scriva, è quest resultat d’attribuir a la malsegirezza en il martgà da l’Egipta.

plazzal ad andermatt
Legenda: Ensemen cun la «Andermatt Swiss Alps AG» bajegia la «Orascom» ad Andermatt sis hotels da quatter e tschintg stailas cun 500 apartaments en 42 bajetgs e 25 chalets. Keystone

La svieuta è sa reducida ils ultims 9 mais per 31% sin 169,9 milliuns francs – quai cumpareglià cun ils medems 9 mais da l'onn passà. Il resultat da l'interpresa avant tschains, taglias, amortisaziuns e deducziuns (EBITDA) è crudà sin in deficit da 14,6 milliuns francs. Sco quai ch’il concern scriva, è la situaziun intscherta en l'Egipta la culpa.

Sut il stritg ha la gruppa da l’investider egipzian Samih Sawiris stuì registrar ina perdita da bundant 60,7 milliuns francs. En la medema perioda da l’onn passà aveva Orascom anc fatg in gudogn da bunamain 3,9 milliuns francs.

Ils investiders han reagì: Suenter ch'ils resultats èn stads enconuschents, hani vendì aczias da l'Orascom. Uschia è il curs da l'aczia crudà per 2,5% sin CHF 5,80.

RR novitads 09:00