Suenter in'entschatta andetga da l'enviern en il nord dal Pakistan èn morts almain 21 turists e turistas indigenas. Pliras milli persunas èn stadas bloccadas sin via tar il lieu da vacanzas Murree en la naiv auta, intginas dad ellas èn stenschidas u scheladas en l'auto, ha communitgà la protecziun civila.
Murree è radund 65 kilometers en il nord-ost dad Islamabad sin 2'300 meters sur mar. Plirs 10'000 abitants ed abitantas da la chapitala eran sa mess sin via envers Murree per giudair la naiv, cunquai ch'ils hotels èn stads fitg spert cumplets han pliras milli persunas stuì restar en l'auto.
La regenza ha declarà il stadi d'urgenza per la regiun ed ha scumandà da charrar en questa direcziun. La populaziun da Murree gida als automobilists cun cuvertas e mangiativas durant che persunal da salvament emprova da deliberar els. Meteorologs quintan anc cun naiv fin la dumengia saira.