Tge territori appartegna a tge naziun? Quella dumonda è sa tschantada en bleras regiuns suenter la fin da la Segunda Guerra mundiala. Quai era en la regiun da l'anteriura colonia da la Gronda Britannia enturn l'India. Il Pakistan è alura sa separà da l'India sco agen stadi. «L'idea era ch'ils stadis cun ina maioritad da muslims sa fusiuneschian tar Pakistan e tals cun ina maioritad hinduistica tar l' India», explitgescha Thomas Gutersohn, correspundent dad SRF per l' Asia dal Sidost.
Nozzas cun l'India - ma cun dretgs d'autonomia
Caschmir era dentant in cas spezial: I sa tractava d'in principadi cun ina maioritad muslima. Il regent dal principadi era dentant hinduist. Tal na haja uschia er betg vulì tutgar tar il Pakistan, mabain restar independent, explitgescha Thomas Gutersohn. Quai cun l'independenza n'è dentant betg propi reussì: Gruppaziuns militaricas en il Pakistan han numnadamain vulì annectar quai territori. Per mitschar da quai ha il regent fatg ina cunvegna cun l'India. Il deal: Caschmir tutga tar l'India, ma salva tscherts dretgs d'autonomia.
Line of control permez Caschmir
Il Pakistan ha fatg segund cun quest deal - e n'ha betg laschà esser bun cun quai. Las Naziuns Unidas han dividì il territori tranter l'India ed il Pakistan. Omaduas naziuns na renconuschian dentant betg questa lingia da separaziun sco cunfin dal pajais. «Igl è be ina lingia che na vegn betg surpassada militaricamain», uschia Gutersohn.
L' empermischun dal referendum
Quai che chaschuna adina puspè conflicts n'è dentant betg la dumonda tge territori che s'auda a tge naziun. Il ver problem saja ch'ils Caschmiris na sa sentian betg sco part da l' India. La situaziun è sumeglianta sco quella dals Catalans en la Spagna. Era ils Caschmiris pretendan in referendum. «Igl è adina vegni empermess ad els ina votaziun tar la dumonda tar tgi ch'els vulan tutgar - tar il Pakistan u l'India - u sch'els vulan esser dal tuttafatg independents. Quai referendum n'hai dentant mai dà.»
Fin cun l'autonomia
L'entschatta avust da quest onn ha il parlament da l'India decidì d'abolir il status spezial dal Kaschmir. In affrunt saja quai per la glieud en il Caschmir, manegia il correspundent. Perquai saja er da quintar che las tensiuns prendan danovamain tiers en il Caschmir.
RR actualitad 12:00