Siglir tar il cuntegn

Header

cuntegn

Exteriur Palladi per l'emprima giada pli char che aur

  • Il scandal da diesel ha er influenza sin ils martgads da materia prima.
  • Perquai che adina dapli persunas midan sin auto cun benzin, è la dumonda da palladi creschida. Palladi vegn duvrà per fabritgar catalisaturs.
  • Il metal cun colur d'argient custa actualmain dapli che aur.

In’unza fina da palladi custa bunamain 1’400 dollars. Quai è uschè bler sco anc mai – e radund 100 dollars dapli che la medema quantitad aur. Sulettamain entaifer l’ultim mez onn è il pretsch da palladi s’augmentà per bunamain 50%.

La raschun è che la dumonda da l’industria d’autos è s’augmentada. Ils concerns d'autos èn ils pli gronds cumpraders da palladi. Il metal prezius vegn duvrà per catalisaturs da motors da benzin. E quels èn suenter il scandal da diesel puspè pli dumandads.

Il medem mument vegn er rapportà ch'ils gronds purschiders da palladi en la Russia e l'Africa dal Sid mantunian il metal prezius empè da porscher quel sin il martgà. Quai cun la speranza ch'il pretsch s'augmentia anc dapli.

Platin sco remplazzament?

Experts supponan che la purschida da palladi na vegnia ils proxims onns betg a cuvrir la dumonda. Sch'il pretsch vegn anc ina giada a s'augmentar pervi da quai è dentant intschert. Per fabritgar catalisaturs fissi numnadamain er pussaivel da duvrar platin. Il metal è sumegliant al palladi, ma entant cleramain pli bunmartgà che palladi.

Ina situaziun sumeglianta hai gia dà avant diesch onns. Quella giada avevan ils producents d'autos midà da platin sin palladi. La raschun è stada, che platin era daventà memia char.

RR novitads 08:00

Artitgels legids il pli savens