Siglir tar il cuntegn

Header

audio
Papa Benedetg XVI. – Joseph Ratzinger è mort – in necrolog
Or da Actualitad dals 31.12.2022. Maletg: Keystone
laschar ir. Durada: 2 minutas 27 Secundas.
cuntegn

Papa Benedetg XVI. emerità Joseph Ratzinger è mort en la vegliadetgna da 95 onns

Il Papa emerità Benedetg XVI. è mort da Silvester en la vegliadetgna da 95 onns. Dal 2005 fin il 2013 era el il chau da la Baselgia catolica. Sia sepultura vegn ad avair lieu ils 5 da schaner sin la plazza da son Peder en il Vatican.

Joseph Ratzinger – l'anteriur Papa Benedetg XVI. – è mort en la vegliadetgna da 95 onns. Quai ha il Vatican communitgà. Papa Francestg ha valità ses antecessur Benedetg XVI. sco carstgaun nobel e buntadaivel. El saja stà in regal per il mund e la Baselgia, ha ditg Francestg tar in servetsch divin d’engraziament per Silvester en il dom da son Peder.

Gia daditg han ins udì ch'i na stettia betg bain cun la sanadad da Joseph Ratzinger. Durant l'avantmezdi dals 28 da december aveva Papa Francestg annunzià ch'i na giaja betg bain cun ses antecessur. El saja corporalmain debel. Durant ina audienza generala aveva il Papa appellà dad urar per Ratzinger. Dapli detagls n'hai là anc betg dà.

Era Papa dal 2005 fin il 2013

Avrir la box Serrar la box

Ils onns 2005 fin 2013 era Benedetg XVI. il chau da la Baselgia catolica. Il 2005 è el vegnì elegì sco successur da Johannes Paul II. ed era uschia l'emprim Papa tudestg dapi bunamain 500 onns.

Il 2013 aveva el – sco emprim papa dapi passa 700 onns – dà giu ses post. El na sa sentiva betg pli abel dad ademplir sia funcziun. Dapi lura viveva el ina vita fitg retratga en ina claustra en il Vatican.

Sepultura ha lieu ils 5 da schaner

La sepultura dal 265avel Papa è planisada per gievgia proxima, ils 5 da schaner. La messa cun Papa Francestg duai cumenzar las 9:30 sin la plazza da son Peder. Benedetg ha giavischà ina ceremonia simpla. Gia il glindesdi vegn la bara ad esser en il dom da son Peder, nua che cristifidaivels pon prender cumià.

RTR novitads 11:00

Artitgels legids il pli savens

Scrollar a sanestra Scrollar a dretga