Sarajevo saja il Jerusalem dal vest, ha ditg il papa. El vegnia sco pelegrin da la pasch en la chapital da la Bosnia-Herzegovina ch'è stada ils onns 90 il center d'ina guerra civila tranter Bosniacs muslims, Serbs ortodox e Croats catolics, ha ditg il papa. Il pajais dal Balcan saja anc 20 onns suenter questa guerra in pajais dividì ed haja gronds problems economics e socials.
Persunas creeschian sapientivamain atmosfera da guerra
Vinavant ha papa Francestg cumplanschì l'atmosfera da guerra sin il mund. I saja sco ina terza guerra mundiala che vegnia fatga toc per toc, ha ditg l'eminenza catolica tar ina messa cun 65'000 visitaders. Intgins veglian far aposta questa atmosfera, ha ditg papa Francestg. A questas persunas ha el renfatschà d'avair in interess politic vi da conflicts.
Igl è l'otgavel viadi en l'exteriur da papa Francestg.
RR novitads 12:00