Siglir tar il cuntegn

Exteriur Papa Francestg ha inscuntrà unfrendas d'abus en l’Irlanda

Durant in’ura e mesa èn il papa e las otg unfrendas sesids ensemen. Malduvrà las otg persunas, umens e dunnas, avevan spirituals paders e represchentants d'instituziuns catolicas, sco il pledader dal Vatican ha ditg. Papa Francestg visita l’Irlanda en connex cun l’inscunter da famiglia mundial.

Il dies da papa Francestg.
Legenda: Papa Francestg fa in’uraziun en la catedrala da Dublin, durant sia visita en l’Irlanda. Reuters

Avant aveva il papa ditg en preschientscha da commembers da la regenza e represchentants da la baselgia, ch’el na possia betg far damain che renconuscher il grev scandal, chaschunà cun l'abus da minorens entras commembers da la baselgia. Ed el condemnia l'abus da persunas minorennas e concedia, che la baselgia haja desditg da tractar endretg ils scandals d'abus en l'Irlanda.

Dapi l'onn 2002 han var 15'000 persunas da l'Irlanda dumandà indemnisaziuns, perquai ch'ellas èn vegnidas malduvradas sexualmain da spirituals catolics.

Betg mo negativ

Il pontifex ha dentant er avertì da betg emblidar la rolla positiva da la baselgia. «La baselgia en Irlanda ha giugà en il passà ed er oz anc in'impurtanta rolla tar la promoziun dal bainstar d'uffants, quella na po betg vegnir snegada.»

Critichers han appellà da boicottar la messa dal papa, ed han organisà in cuntereveniment en il center da Dublin.

Schef da regenza pretenda acziuns

Leo Varadkar, il schef da regenza ha appellà a Francestg da duvrar sia influenza per procurar per «giustia e vardad» en ils cas d'abus da la baselgia catolica en Iralanda. Als pleds stoppian era suandar acziuns. Las plajas sajan profundas ed anc adina avertas.

Nus supplitgain Vus da tadlar las unfrendas ed ils survivents. Nus savain che Vus vegnis a far quai.
Autur: Leo VaradkarSchef da regenza da l'Irlanda

Il medem mument ha Varadkar discurrì d'ina istorgia communabla da «paina e vargugna», nua ch'era il stadi da l'Irlanda haja giugà ina rolla nungloriusa.

Purtret dals dus umens che salidan in l'auter.
Legenda: Papa Francestg ed il schef da regenza irlandais, Leo Varadkar. Reuters

RR novitads 17:00++