Siglir tar il cuntegn

Exteriur Papa Francestg regorda al genocid vi dals Armens

Sin ses viadi tras l’Armenia ha papa Francestg rinforzà cun in’uraziun commoventa sia condemnaziun dal genocid vi dals Armens. Il papa ha fatg staziun ad Eriwan tar il memorial per il genocid.

Il papa metta giu per terra ina rosa alva.
Legenda: Il papa regurda al genocid vi dals armens - visita tar il memorial ad Eriwan, Keystone

Gia tar il cumenzament da ses viadi il venderdi passà aveva papa Francestg condemnà la persecuziun sistematica da la minoritad armena cristiana en l’imperi Osman l’onn 1915 sco genocid. Cun condemnar uss il genocid dals Armens vegn papa Francestg a nutrir danovamain tensiuns cun la Tirchia.

Tensiuns cun la Tirchia èn programmadas

Gia l’onn 2015 aveva papa Francestg discurrì da la persecuziun sistematica dals Armens da «l’emprim genocid dal 20avel tschientaner». Sinaquai aveva la Tirchia cità il ambassadur dal Vatican en il ministeri da l’exteriur.

L'ultim di dal viadi dal papa en Armenia

Tar sia uraziun è il papa vegnì accumpagnà dal president Sersch Sargsjan e da Katholikos Karekin II., il manader da la baselgia armena. Suenter è viagià il papa a Gjumri, la segund-gronda citad armena. Oz è l’ultim di da sia visita. L’october è planisada ina visita papala en Aserbaidschan, il pajais inimi da l’Armenia, ed en Georgia.

RR novitads 23:00

Il genocid vi dals Armens

Ina scena da via l'on 1915. Suldada osmana metta in lingia Armens.
Legenda: Persecuziun Osmana sistematica.

Dal 1915 enfin il 1917 aveva l’imperi Osman persecutà e mazzà sistematicamain Armens. Passa in milliun umans duajan avair pers lur vita. La Tirchia sco successura da dretg da l’imperi Osman snega enfin oz che las mazzacras vi da la populaziun armena sajan stads in genocid. L’Armenia e la Tirchia n’han nagina relaziun uffiziala ensemen.