Siglir tar il cuntegn
Inhalt

Exteriur Papa: «la Pasca envida da rumper cun disas monotonas»

Durant la celebraziun da la levada ha papa Francestg pretendì da nizzegiar la chaschun da rumper disas monotonas. Quai er en connex cun malgiustia.

Papa Francestg.
Legenda: Papa Francestg vul motivar da cumbatter pli fitg cunter ingiustia. Keystone

La Pasca envidia da rumper cun disas monotonas e da renovar nossa vita, nossas decisiuns e nossa existenza, ha papa Francestg ditg durant la celebraziun da la lavada da Jesus.

Rumper duain ins cunzunt er las disas en connex cun la malgiustia. Uschia crajan blers «giuvnals irritads« ch'ins na sappia far nagut per meglierar l'ingiustia che «blers da noss frars pateschan en lur atgna charn». Ed er l'indifferenza e la demotivaziun ha il pli aut da la baselgia cristiana crititgà.

Batten dad otg creschids

Durant la messa la la levada, la sonda notg ha er gì lieu il batten dad otg persunas creschidas. Tranter quellas è er in fugitiv da la Nigeria, che vala en l'Italia sco erox perquai ch'el ha cruschà in'attatga armada.

Pasca a Roma

La festa da Pasca regorda a la levada da Jesus Christus ed è uschia ina da las festas las pli impurtantas per la baselgia cristiana. 100'000 persunas passentan lur Pascas a Roma.

Messa da Pasca e benedicziun speziala

La dumengia ha il papa celebrà ensemen cun 10'000 da cartents la messa da Pasca sin il plaz da son Peder. E silsuenter ha el dà la benedicziun tradiziunala «Urbi et Orbi». Tar quella ha appellà als umans d'avair in cor per las surpraisas da dieu. Papa Francestg ha menziunà ils numerus territoris da crisa en l'entir mund. El ha rugà per pasch en spezial per la Siria nua che la populaziun saja stancla d'ina guerra bunamain infinita.

Vitiers ha el appellà ch'i vegn respectà il dretg internaziunal umanitar ed ha rugà per la reconciliaziun per l'Israel ed ils territoris palestinais.

Urbi et Orbi

Questa benedicziun è in dals pli enconuschents ritus da la baselgia catolica. Ella munta «a la citad ed al mund» e vegn dada sulet da Nadal, da Pasca e suenter l'elecziun d'in papa.

Mesiras da segirtad strictas

Suenter ch'i ha dà pliras arrestaziuns pervia da suspect da terror en l'Italia en ils davos dis, valan durant las festivitads pascalas mesiras da segirtad strictas.

RR novitads 11:00