Siglir tar il cuntegn
Inhalt

Exteriur Papa prenda cun sai 12 fugitivs da Lesbos a Roma

Sin l’insla grecca Lesbos en la Mar Egeica ha papa Francestg commemorà als tschients fugitivs ch’han pers lur vita sin la Mar Mediterrana. Tar ses return ha il pontifex prendì cun sai plirs fugitivs.

Il papa inscuntra migrants a Lesbos.
Legenda: Il papa inscuntra migrants a Lesbos. Reuters

Papa Francestg ha visità l'insla grecca Lesbos. Quella è ordvart pertutgada da la crisa da fugitivs. Il parsura da la baselgia catolica è s'inscuntrà cun fugitivs ed è sa regurdà vid las unfrendas da la migraziun.

Dudesch fugitivs accumpognan il papa a Roma

Sin ses viadi da return a Roma ha il papa prendì cun sai dudesch fugitivs, tranter quels sis uffants. I duai sa tractar da trais famiglias sirianas che duain vegnir alloschadas da l’organisaziun catolica da laics Sant’Egidio.

Commentaturs valiteschan l’act sco segn dal sustegniment per la Grezia e sco critica vi d’ina politica da la cunfinaziun e da cunfins serrads en l’Europa.

Papa Francestg è gia s'engaschà differentas giadas per fugitivs. Be paucs mais suenter ch'el era entrà en uffizi avant trais onns ha el visità l'insla Lampedusa en la Mar Mediterrana. La gievgia sontga ha el lavà ils pes a plirs fugitivs a Roma.

Fan bainvegni a Papa Francestg: Il primminister grec Alexis Tsipras (mez) ed l'archuvestg Ieronimos (dre.).
Legenda: Fan bainvegni a Papa Francestg: Il primminister grec Alexis Tsipras (mez) ed l'archuvestg Ieronimos II (dre.). Reuters

«Igl è in trist viadi»

En il champ da recepziun da Moria ha l’Argentin salidà persunalmain radund 250 requirents d’asil e gentar cun otg dad els. Plinavant han il papa ed ils manaders da las baselgias suttascit ensemen ina decleraziun ed urar per umans ch’han pers lur vita en fugia sin la Mar Egeica.

«Igl è in trist viadi. Nus entupain la pli gronda catastrofa umanitara dapi la Segunda Guerra mundiala», ha ditg il parsura da la Baselgia catolica durant il sgol. Sin l’insla Lesbos spetgia el «blers umans che pateschan, che na san betg nua ir, ch’han stuì fugir», ha ditg l’um da 79 onns.

RR novitads 10:00 / 18:00