En la brev appelescha il papa als spirituals da decider tenor l'atgna cunscienzia da cas tar cas sche pèrs spartids e puspè maridads d'astgan sa participar a la communiun.
Papa Francestg scriva er davart temas sco la passiun e l'erotica sco parts da l'amur. Temas ch'èn fin ussa bunamain adina vegnids exclus da la Baselgia catolica.
Claras indicaziuns co ir enturn cun l'omosexualitad e pèrs spartids na fa il papa dentant betg. I saja cler ch'ins na possia betg spetgar da la sinoda ni da questa brev reglas generalas sco ina lescha per duvrar en tut ils cas.
Differentas interpretaziuns d’Amoris Laetita
Perquai che la brev na cuntegn betg reglas generalas po mintgin er interpretar sez il scriver co el vul. Tranter auter scriva il teolog tudestg Wolfgang Beinert d’ina refurma da la baselgia catolica. La fatschada stettia, i sa furmi dentant insatge nov. Propi in scriver da refurma.
Er la professura da dogmatica e teologia fundamentala Eva-Maria Faber vesa il scriver sco refurma ed è intgantada dal tun fitg sensibel ed empatic da papa Francestg. Il scriver muntia propi in pass direcziun realitad e la baselgia mussi uschia ch’ella na stettia betg eri tar las temas.
L’uvestgieu da Cuira interpretescha dentant auter il scriver, tenor el sa distanziescha il papa da la diversitad da la famiglia ed er da teorias da gender. Papa Francestg scriva dentant er ch’el haja chapientscha per quels che giavischian reglas pli strictas per evitar irritaziuns.
RR novitads 12:00