Il mardi suentermezdi suenter las quatter ha la polizia da Paris avertì la publicitad via il servetsch da novitads curtas Twitter da guntgir ils conturns da la baselgia Notre Dame pervi dad in'acziun da polizia.
Sco quai che la polizia ha confermà a l'agentura da novitads tudestga DPA haja in um attatgà in policist. En il fratemp è vegnì enconuschent tras pliras agenturas da novitads, che l'um haja sbragì tar si'attatga ad in policist «Quai è per la Siria». L'um era s'avischinà ad ina patruglia da trais policists ed haja blessà ad in dad els levamain cun in martè.
Var in'ura pli tard è seguì la proxima communicaziun, numnadamain che la situaziun saja sut controlla. In policist saja vegnì blessà. L’attatgader supponì saja vegnì neutralisà e purtà a l’ospital.
Ils radund 900 visitaders da la baselgia han stuì spetgar ed han suenter lura pudì sortir in ad in da Notre Dame.
Tranter ils visitaders da la baselgia Notre Dame a Paris era er l'anteriura cussegliadra da segirezza e politicra da l'exteriur Nancy Soderberg. Er ella è s'annunziada via twitter.
Sche l'attatga ha ragischs terroristicas n'è betg anc enconuschent. La partiziun anti-terror da la procura publica da Paris investighescha.
La Frantscha vegn scurlattada dapi radund dus onns amez dad ina seria dad attentats terroristics che han custà a radund 240 persunas la vita, scriva l'agentura da novitads svizra SDA.
Las forzas da segirtad eran gia pliras giadas en mira dad attatgaders. La mesadad d'avrigl era vegnì sajettà in policist a Paris sin las Champs-Elysées dad in attatgader.
RR novitads 18:00