Per ina ceremonia èn sa radunadas fullas da persunas sin la plazza centrala da la chapitala franzosa per commemorar las unfrendas da las attatgas terroristicas. Durant la ceremonia han il president franzos François Hollande e la burgamestra da Paris Anne Hidalgo svelà ina tavla commemorativa al pe d'in ruver nov plantà.
En memoria da las unfrendas da las attatgas terroristicas dal schaner e november 2015 a Paris, Montrouge e Saint-Denis.
Tar in center da cumpra giudaic en l'ost da la chapitala, aveva il primminister Manuel Valls envidà chandailas l'avantmezdi per las persunas ch'èn vegnidas mazzadas là d'in attatgader islamic.
Valls è sa mess a la vart da la cuminanza giudaica. Senza ils gidieus franzos na fiss la Frantscha betg la Frantscha, ha ditg Valls. El ha avertì da l'antisemitissem che saja era preschent ozendi.
Cun questas ceremonia finescha l'emna che la Frantscha è sa regurdada dals schabetgs tragics chaschunads dal terror islamistic. Il schaner eran 17 persunas mortas tar ina seria d'attentats, 12 da questas tar l'assagl da la redacziun dal magazin satiric "Charlie Hebdo". Ils 13 da november eran 130 persunas mortas tar in'ulteriura seria da plirs attentaders a Paris.
RR novitads 06:00/17:00
