Siglir tar il cuntegn

Header

cuntegn

Paris SUVs d'ordaifer pajan bainbaud 18 euros l'ura per parcar

A Paris duain las taxas da parcar per SUVs vegnir multiplitgadas cun trais. Las votantas ed ils votants han approvà in project correspundent da la regenza da la citad cun stgars 55% da las vuschs.

Concret duai il parcar d'in SUV en la citad interna da Paris custar en l'avegnir 18 euros l'ura enstagl da 6 euros sco fin ussa. Var 1.3 milliuns abitantas ed abitants da la chapitala franzosa èn stads clamads a l'urna sut il motto «dapli u main SUVs a Paris?».

Paris
Legenda: Keystone

Mo stgars 6% da quellas persunas èn sa participadas a la votaziun tenor il resultat final provisoric. Var 54,5% han vuschà per l'augment da las taxas per parcar. Cun quai vegn realisà il plan da l'administraziun da la citad, tenor il qual i duai custar per ils SUVs e per auters autos grevs 18 euros enstagl da 6 euros per ura, ed en ils districts exteriurs 12 euros enstagl da 4 euros.

La finamira: damain SUVs d'ordaifer

L'argument da la citad per taxas pli autas: las carossas grevas procurian per ina contaminaziun da l'ambient pli gronda, ellas dovrian bler spazi public e pericliteschan la segirezza dal traffic. Cun la tariffa speziala per autos gronds duessan vegnir limitadas las mulestas chaschunadas dad els.

La tariffa speziala duain pajar exclusivamain visitadras ed ils visitaders. Las abitantas ed ils abitants duain vegnir exceptads medemamain sco mastergnants e servetschs da tgira. La tariffa duai valair per models cun carburants fossils e models ibrids cun ina paisa a partir dad 1,6 tonnas e da models electrics a partir da duas tonnas paisa. Per chasas da parcadi privatas na vala la regulaziun betg.

RTR novitads 06:00

Artitgels legids il pli savens