Stefan Brändle ha gì l'impressiun ch’igl haja pli pauc glieud sin via oz che normal. Quai saja bain pussibel perquai che la Frantscha haja l'emna da 35 uras ed uschia saja in u l'auter forsa restà a chasa l’avantmezdi.
Dapli polizia n'haja quai betg sin via, uschia il correspundent. Gia dapi mez onn haja quai patruglias tar impurtantas staziuns da la metro ubain tar bajetgs publics Tscherts da quels bajetgs sajan dentant serrads il mument pervia dal stadi d'urgenza ch'il president franzos, Fançois Hollande ha proclamà.
Minuta da silenzi da mezdi
Oz da las dudesch ha l'entira Europa commemorà las unfrendas da Paris cun ina minuta da silenzi. L'act da terror valia sco in'attatga sin tut ils stadis da l'UE, han communitgà ils schefs da stadi e da las regenzas da l'Uniun europeica.
Sco reacziun sin las attatgas aveva il president franzos François Hollande decidì ina malencurada naziunala, quella dura da la dumengia fin mardi. Ina tala malencurada datti mo darar en Frantscha. Tut las bandieras en Frantscha èn sin mesa asta.
