Siglir tar il cuntegn
cuntegn

Exteriur Parlamentara britannica è morta suenter in’attatga

En il nord da l'Engalterra è la deputada da la partida Labour Jo Cox morta suenter in attentat, quai communitgescha la polizia ad ina conferenza da medias.

Jo Cox era vegnida sgulada cun grevas blessuras en l'ospital.
Legenda: Jo Cox era vegnida sgulada cun grevas blessuras en l'ospital. Keystone

La raschun per il delict na saja betg clera. La deputada da 41 onns era vegnida attatgada datiers da Leeds. Tenor rapports da medias ha Cox intervegnì en ina dispita tranter dus umens. In haja tratg in'arma ord la tastga e sajettà duas giadas. La polizia ha confermà ch'in um saja vegnì arrestà en la regiun. Detagls n'ha ella però betg numnà.

Politichers da tut las partidas han reagì consternads. Il cumbat da votaziun davart la sortida da la Gronda Britannia ord l'Uniun europeica è vegnì sistì per oz.

Jo Cox era enconuschenta per ses cumbat per ils dretgs da dunnas. En la debatta actuala davart il Brexit era ella s'exprimida per restar en l'Uniun europeica.

RR novitads 20:00