Suenter che prest tuttas vuschs èn stadas dumbradas or è Mansur Yava da la partida d'opposiziun CHP stà cun 50,9% da las vuschs, prest 4 puncts davant il candidat da la AKP, la partida dad Erdogan.
Er sche nossa glieud ha pers l'uffizi dal burgamester, els han dà ils quartiers da la citad a l'AKP.
Fitg stretg è il resultat ad Istanbul. Qua ha il candidat da al AKP tenor emetturs da televisiun in avantatg da radund 4'000 vuschs – tar en tut passa 8 milliuns cedels da votaziun inoltrads. Tant l'AKP sco era l'opposiziun han reclamà la victoria per els. Erdogan ha ditg davant aderents ad Ankara che la partida vegnia en il mender cas a cumbatter il resultat.
Ina dumonda dal surviver
Sche la partida da la regenza stess davos l'opposiziun fiss quai ina terrada simbolica fitg significanta. En la citad dal Bosporus ha Erdogan numnadamain cumenzà ils onns 90 sia carriera politica. Erdogan ha ditg che sia regenza vegnia a sa concentrar fermamain sin ina buna politica d'economia. El aveva er ditg avant las elecziuns che questas elecziuns sajan ina dumonda dal surviver per il pajais. En il pajais resta l'AKP cun 45% dentant la partida la pli ferma.
Regiuns turisticas han votà per opposiziun
Suenter ils ultims resultats publitgads ha l'AKP er pers Anadolu. Er la destinaziun turistica dad Antalya ed Adana en il sid da la Tirchia èn ids a l'opposiziun. Er la metropola a la costa, Izmir è ida cleramain a la CHP, sco era tuttas provinzas a la costa dal vest. l'AKP ha dominà en l'Anatolia centrala.
Radund 57 milliuns Tircs èn vegnids clamads a l'urna per eleger burgamester, cussegliers communals ed auters politichers en 81 provinzas. La participaziun a las elecziuns è stada tar 84%.
RR novitads 06:00
