Sin il segund plaz suondan ils conservativs cun 30 mandats. Ils socialdemocrats dal schef da regenza Algirdas Butkevicius survegnan mo 17 sezs en il parlament. Butkevicius ha pers ses mandat.
Da la polizia en la politica
Salius Skvernelis il candidat il pli impurtont da la Partida dals purs e verds (LGPU) vul procurar per in nov start en la politica. El vul ina politica transparenta e raschunaivla. Skvernelis vul era ina regenza da coaliziun raziunala e perquai vair persunalitads che vulan la midada en la politica. La partida vesa sa sezza sco partida da miez.
Skvernelis era avant il schef da la polizia. El n'è betg commember da la partida LGPU, è dentant candidat per la plazza sco primminister. El saja fitg popular tar la populaziun pervi da ses cumbat encunter la corrupziun. Per dapi dus onns è el en la politica ed ha gia lavura sco minister da l'intern.
Directur uffizial da la partida è Ramunas Karbauskis, in possessur da terren ed industrial. El aveva empermess durant il cumbat electoral da vulair auzar las pajas e da procurar per in creschament da l'economia per franar l'emigraziun da tants giuvens. Per cuntanscher questa finamira ha el proponì ina regenza da coaliziun ord tuttas partidas che duai purtar la regenza d'experts.
RR novitads 09:00