Exteriur - Pascal Weber - il schurnalist che rapporta da la guerra

Entrar en guerra, en ils lieus ils pli privlus dal mund per pudair rapportar da quai che capita. Pascal Weber vul che la glieud sa tge che capita. Quai è la raschun daco ch'el rapporta dals lieus da crisa: «Jau na vuless mai stuair dir che jau n'haja betg savì tge che capita en quellas regiuns, en quels pajais. Jau vuless chapir daco che quai capita e pertge, ed jau vuless che nagin en Svizra po dir ch'el u ella na saveva betg tge che capita e tge che guerra è.» Uschia il schurnalist. El di dentant er ch'el na possia betg influenzar tge che la glieud fa cun las infurmaziuns.

1 / 6

Legenda: Homs Pascal Weber emprova da tschertgar la vardad tar la glieud simpla – lur vardad. Pascal Weber

2 / 6

Legenda: Libanon: Ina visita en in champ da fugitivs. Pascal Weber

3 / 6

Legenda: Tripoli «Jau vuless che nagin en Svizra po dir ch'el u ella na saveva betg tge che capita e tge che guerra è». Pascal Weber

4 / 6

Legenda: Mosul Avant 8 onns ha Pascal Weber decis dad ir sco correspundent en il Orient Central. Pascal Weber

5 / 6

Legenda: Irac Per el sco istoricher, politolog e schurnalist èsi in regal da pudair esser là, nua che l'istorgia vegn scritta. Pascal Weber

6 / 6

Legenda: Sinjar Hawraz I dettia er bler positiv en sia professiun, sco l'ospitalitad da la populaziun. Muments nua che Pascal Weber po emblidar per intgins muments quai che capita enturn el. Pascal Weber

Avant otg onns ha Pascal Weber decis dad ir sco correspundent en l'Orient Central. La situaziun, sin la quala el era sa preparà, era dentant tut in' autra. Quatter mais suenter ch'el ha entschet sia lavura en l'Orient Central han cumenzà las revoltas che n'han betg mo mess sin il chau il mund arab, ma er quel da Pascal Weber.

Per mai èsi in regal da pudair esser qua e rapportar.

Per el sco istoricher, politolog e schurnalist èsi in regal da pudair esser là, nua che l'istorgia vegn scritta, di Pascal Weber. Dentant saja quai era collià cun eveniments ch'èn enorm grev da digerir e che fan vegnir trist el. Ed insumma betg in regal per el saja, sch'el vesia co che la glieud sto patir e sch'el vesa tut la desperaziun.

Tut las istorgias che jau aud e ves qua tractan da vita e mort – deplorablamain quasi adina da la mort.

Dus, trais giadas saja el vegnì en situaziuns privlusas. Dentant guarda el adina dad ir en territoris, nua ch'i na vegn per il mument betg cumbattì.

En sasez sun jau in chajachautschas.

Cun ir en regiuns da crisas sco schurnalist stoppia el esser conscient da sia incumbensa. Sco schurnalist na sajan ins betg al lieu per porscher agid umanitar, ins saja là per documentar quai che capitia. Dentant quai na saja betg adina uschè simpel.

Tge è vair e tge betg

Attent stoppian ins esser cun infurmaziuns. Perquai evitescha Pascal Weber da far intervistas cun politichers auts: «Quai ch'els din è tut mo propaganda.» Pascal Weber emprova da tschertgar la vardad tar la glieud simpla – lur vardad.

RR actualitad 17:00