Siglir tar il cuntegn
Inhalt

Exteriur Passa 1'200 morts sin l'insla Sulawesi

Il dumber da morts tras ils terratrembels ed il tsunami sin l'insla Sulawesi en l’Indonesia è creschì marcantamain sin almain 1'234. Quai ha communitgà l’autoritad da protecziun naziunala en cas da catastrofas. Fin ussa discurrivan ins da passa 840 persunas.

vista sin il terren devastà d'in terratrembel sin l'insla Sulawesi
Legenda: Anc na datti anc nagina survista dals donns e da las unfrendas. Keystone

Il destin da millis abitants da territoris periferics n'è anc adina betg cler. En blers lieus mancan las maschinas grondas per transportar davent las ruinas. Tenor l'autoritad da catastrofas naziunala èn almain 99 persunas sparidas.

Dus ulteriurs terratrembels

Il mardi è il sid da l'Indonesia vegnì scurlattà d'ulteriurs terratrembels. Avant l'insla Sumba han ins mesirà la fermezza 5,9, e curt suenter in terratrembel da 6,0. Rapports davart donns u unfrendas na datti anc betg. Sumba è radund 1'600 km en il sid da la citad Palu ch'è vegnida tutgada fermamain dal terratrembel e oravant tut dal Tsunami.

Chadaina da fortuna

Il venderdi da quest'emna organisescha la Chadaina da fortuna in di da rimnada naziunal per las unfrendas dal terratrembel e dal Tsunami en l'Indonesia.

RR novitads 10:00