Exteriur - Passa 200 morts a Sri Lanka

1 / 8

Legenda: La destrucziun en la baselgia a Colombo è enorma. Keystone

2 / 8

Legenda: En tge connex che las explosiuns stattan n’è anc betg cler. Keystone

3 / 8

Legenda: Tar las attatgas èn vegnidas mazzadas passa 180 persunas. Reuters

4 / 8

Legenda: Da l'explosiun èn fanestras e portas da la baselgia vegnidas donnegiadas. Reuters

5 / 8

Legenda: In parent d'ina unfrenda davant ina da las baselgias attatgadas a Colombo. Reuters

6 / 8

Legenda: Ina statua da Nossadunna destruida davant la baselgia a Colombo. Reuters

7 / 8

Legenda: Il persunal dal militar survegn intginas infurmaziuns per lavurar enavant. Reuters

8 / 8

Legenda: Investigaders fotografeschan ed examineschan la scena da crim en il Shangri-La hotel a Colombo. Reuters

• Tar otg explosiuns en baselgias e hotels a Sri Lanka èn fin uss almain 207 persunas mortas.
• Almain 450 persunas èn vegnidas blessadas. Svizzers n'hai betg tranter las unfrendas, ha confermà l'EDA.
• Anc n'ha nagina gruppa terroristica reclamà las attatgas per els. Il minister da defensiun discurra dentant cleramain d'ina attatga terroristica e da gruppas extremisticas.
• 7 persunas èn entant vegnidas arrestadas.

Sis detunaziuns en 30 minutas

Tar ina seria d'attatgas sin baselgias cristianas e hotels la dumengia da Pasca a Sri Lanka hai dà almain 207 morts, tranter quels er 12 persunas da l'exteriur.

Legenda: Las citads pertutgadas da las attatgas, Colombo, Negombo e Batticaloa. SRF

Las emprimas sis explosiuns èn capitadas durant messas da Pasca en trais baselgias en differentas parts dal pajais sco era en trais hotels da luxus en la chapitala da Colombo. Las ultimas duas explosiuns èn capitadas en l'aglomeraziun enturn la chapitala. La setavla er en in hotel. L'otgavla en in quartier d'abitar er en in lieu da l'aglomeraziun da Sri Lanka.

Naginas unfrendas svizras

Tenor indicaziuns da l'ospital hai tranter las unfrendas burgais americans, Brits e Nerlandais. Burgais svizzers n'èn tenor emprimas enconuschientschas betg tranter las unfrendas, ha communitgà il Departament per affars exteriurs sin dumonda da SRF. Ins stettia en contact cun las autoritads localas.

Populaziun duai star a chasa

Il minister d'economia Harsha de Silva ha declerà suenter ina visita a trais dals lieus d'attatga, ch'i haja er dà unfrendas da l'exteriur. El ha plinavant avertì la populaziun da star a chasa. Er las ambassadas da stadis dal vest han clamà si lur burgais dad ir en segirezza. La Sri Lanka Airlines ha supplitgà passagiers da Colombo d'arrivar almain quatter uras pli baud a l'eroport, perquai che las controllas vegnan fatgas uss pli severas.

Il pertge anc betg sclerì

En tge connex che las explosiuns stattan n'è anc betg cler. Il minister da defensiun Ruwan Wijewardene ha discurrì d'ina «attatga terroristica» e da «gruppas extremisticas». Plinavant ha el exequì in scumond da sortir dapi las 18:00 la saira.

Silke Diettrich, correspundenta da l'ARD metta a lieu:

Condolientscha da bleras naziuns

Politichers da tut il mund han condolà e condemnà las attatgas. Il president da la Confederaziun, Ueli Maurer è s'exprimì sur Twitter:

Er Angela Merkel, la chanzelira tudestga, Emmanuel Marcron il president franzos e Wladimir Putin, president da la Russia han condemnà las attatgas ed exprimì lur condolientscha per la cuminanza cristiana.

RR novitads 08:00