Siglir tar il cuntegn
cuntegn

Exteriur Passa 370 unfrendas suenter il tsunami en l'Indonesia

Il tsunami ha tutgà la costa da l’Indonesia la sonda saira. Il dumber dad unfrendas, sparids e blessads crescha anc adina.

donns en chasa...
Legenda: Era 2 dis suenter il tsunami restan pliras regiuns malamain cuntanschiblas. Keystone

Entant discurran las autoritads da l'Indonesia da passa 370 persunas mortas – e passa 1000 persunas blessadas. Tar las bleras unfrendas sa tractia quai da turists indones. Pertutgada era cunzunt la costa da la stretga da la mar tranter las inslas Sumatra e Java. 100 persunas valan sco speridas.

Gronds donns

Tozzels da bajetgs èn crudads ensemen pervi dal tsunami. Las undas grondas èn arrivadas a terra, senza ch’ils carstgauns avevan survegnì in avertiment, sco in pledader da las autoritads ha ditg. Chaschunà il tsunami ha probablamain in vulcan ch'è rut ora, uschia l’agentura per geofisica da l’Indonesia. Quel ha chaschunà in sbuvaditsch en la mar, e 24 minutas pli tard è il tsunami arrivà.

Il settember gia ina catastrofa

L'Indonesia che consista da bleras inslas è adina puspè confruntada cun undas grondas da tsunamis che han consequenzas catastrofalas. Il pli savens èn terratrembels sut il funs da la mar la culpa.

Pir il settember passà aveva in terratrembel da 7,4 tutgà l'insla turistica Sulawesi. Curt suenter era in tsunami arrivà en la regiun enturn la citad da Paul. Passa 2'200 persunas eran mortas, e millis blessadas.

RR novitads 06:00+