Siglir tar il cuntegn

Header

cuntegn

Exteriur Passagiers eviteschan mazzacrada en tren per Paris

Dus schuldas americans han ensemen cun auters passagiers evità venderdi saira ina attatga en in tren ch’era sin via dad Amsterdam a Paris. Els han pudì metter a ferm l'um da 26 onns oriund dal Maroc che sajettava cun ina Kalaschnikow en il tren.

«Nus avain udì in sajet ed in vaider ch’è rut», ha il gardist american ditg a l’emettur da televisiun franzos BFMTV. «Jau hai guardà enavos ed hai vis co in um è vegnì viaden cun ina Kalaschnikow enta maun.»

Nus avain pitgà uschè ditg ad el sin la testa, fin ch’el è stà senza schientscha.
Autur: schuldà american

L'attentader probabel

Avrir la box Serrar la box

Tenor ils investigaders sa tracti d’in um da 26 onns, oriund dal Maroc, che viveva per part en Spagna. Il servetsch secret da la Spagna haja valità el sco islamist radical ed alarmà las autoritads franzosas. Sco quai ch’i para è el stà avant l’attentat en la Siria.

Els sajan alura stads a granugl e cura che l’um saja vegni sper els ora sa bittà sin l’um. «Mes ami è vegnì blessà cun in cuntè ed jau hai tschiffà la buis», di el. «Nus avain pitgà uschè ditg ad el sin la testa fin ch’el è stà senza schientscha.»

Er auters gidan

Er auters passagiers han gidà ils dus schuldads. Tranter quels in ami dals schuldads, in student american, ed in Brit da 62 onns che era vegnì vitiers. Avant ch’els hajan pitgà l’attatgader senza schientscha, haja quel be pli clamà «Dà a mai puspè mia buis, dà a mai puspè mia buis», uschia il student american.

Snega in motiv terroristic

Il schuldà american blessà cun il cuntè sco era in passagier ch’è vegnì blessà d’in sajet na sajan betg en privel da vita. La polizia ha arrestà l’attentader supponì a la staziun Arras en il nord da la Frantscha. El era entrà en il tren a Brüssel. La raschun daco ch'el ha sajettà enturn en il tren da Thalys n’è anc adina betg clera. Tenor indicaziuns da la polizia snega el dentant in motiv terroristic.

Bernard Cazeneuve
Legenda: Keystone
Ils umens han pli probabel evità in drama orribel.
Autur: Bernard Cazeneuve minister da l’intern franzos

Obama ed Hollande engrazian

Il president franzos, François Hollande, vul s’inscuntrar cun ils passagiers ch’han mess a ferm l’attentader. El haja telefonà la sonda l’avantmezdi cun in Franzos e plirs Americans ed engrazia per lur curaschi extraordinari, ha ditg il minister da l’intern Bernard Cazeneuve. Hollande vegnia a beneventar els ils proxims dis en ses sez uffizial per exprimer l’engraziament da la Frantscha.

Gia avant aveva il president dals Stadis Unids, Barack Obama, engrazià als schuldads per lur intervenziun curaschusa.

Polizia patrugliescha

Il mument patruglieschan policists en ils trens rapids. Er sin ils perruns a Brüssel, nua che l’attentader è entrà en il tren, è la polizia vi da patrugliar. Las autoritads franzosas e belgias han instradà las retschertgas. Ellas vulan er eruir sche quest'attatga è stada in act terroristic.

Era la procura publica da Paris che s'occupa dal cumbat cunter il terrorissem prenda part a las retschertgas. Il primminister da la Belgia ha convocà ina sesida dal Cussegl da segirezza naziunal.

RR novtidas 06:00/12:00/18:00

Artitgels legids il pli savens