Siglir tar il cuntegn

Header

cuntegn

Patentas da chatscha L'Africa dal Sid dat liber intgins animals periclitads

L'Africa dal Sid ha dà liber intginas patentas da chatscha per sajettar animals periclitads. Total sa tracti da 10 rinoceros nairs, 150 elefants ed er plirs leopards duai esser pussaivel da sajettar sut tschertas circumstanzas, ha declerà il ministeri per l'ambient.

Cun las entradas da las patentas, vulan las autoritads sustegnair las vischnancas ruralas en ils territoris da chatscha.

Rinoceros nair anc adina ferm periclità

Ils rinoceros nairs valan tar la International Union for Conservation of Nature vinavant sco ferm periclitads. Il dumber dals animals è sa dublegià ils ultims 30 onns, sin oz radund 5'000. Il ministeri ha declerà ch'il dumber che possia vegnir sajettà, vegnia eruì entras las dumbraziuns ch'ins fetschia.

Ils onns 2014 fin 2017 era il dumber da fraud dals animals creschì a moda dramatica. En media vegnivan mazzads 1'000 rinoceros nairs ad onn a moda illegala durant quest temp. Il problem han ins dentant pudì franar. L'onn passà èn vegnids sajettads 451 dals rinoceros a moda illegala.

Populaziun d'elefants crescha

La quota da chatscha uffiziala per elefants hajan ins definì en accordanza cun las leschas internaziunalas davart il commerzi cun animals periclitads, ha declerà il ministeri. La populaziun d'elefants creschia e 150 tocs correspundian a pli pauc che 0,3% da la populaziun.

Tar ils leopards pon be vegnir chatschads ils animals ch'èn pli vegls che set onns e be en regiuns nua che la populaziun è stabila u s'augmenta.

RTR novitads 09:00

Artitgels legids il pli savens

Scrollar a sanestra Scrollar a dretga