Las vias e plazzas turisticas a Londra èn bain plain reclamas, dentant naginas reclamas politicas. Ni sin il Piccadilly Circus, ni avant il Buckingham Palace ni en la Oxford Street - nagliur èn da vesair placats cun parolas pro u contra in Brexit u cun chaus da politichers.
La votaziun da Brexit occupa dentant ils turists ed els èn era bain infurmads - surtut ils turists che derivan ord pajais europeics. Blers speran che la Gronda Britannia restia vinavant commembra da l'UE.
Tema omnipreschent en las gasettas
The Guardian ha publitgà ina fotografia da Jo Cox, la parlamentaria ch'è vegnida mazzada, e tematisescha schebain il primminister David Cameron nizzegia questa tragedia per ses votums da restar en l'Uniun Europeica. The Daily Telegraph mussa ina gronda fotografia da Boris Johnson, in dals pli prominents politichers che vuless sortir da l'UE, ch'è da l'avis che la Gronda Britannia haja be ina giada la schanza da midar l'istorgia da l'entira Europa.
