Suenter che la pausa da cumbat è ida en vigur turnan millis persunas palestinaisas enavos en il nord da la Strivla da Gaza danunder ch'ellas eran vegnidas stgatschadas. Maletgs mussan enitras colonnas da persunas e vehichels che fan quest viadi. Ellas ed els eran fugids da las attatgas iraelianas direcziun sid. Tge che spetga las persunas suenter la destrucziun en la Strivla da Gaza ed en la citad da Gaza n'è betg cler.
-
Bild 1 von 3. Millis turnan enavos en il nord da la Strivla da Gaza e la citad da Gaza. Bildquelle: Keystone.
-
Bild 2 von 3. Er sch'il futus è intschert, persunas stgatschadas turnan. Bildquelle: Keystone.
-
Bild 3 von 3. Cun tut ils vehichels pussaivels sa mova la caravanna enavos en direcziun nord. Bildquelle: Keystone.
Guerra terminada, di la Hamas
L’organisaziun terroristica Hamas ha declerà la guerra da Gaza sco terminada. Ins haja survegnì empermischuns da la regenza americana e dals intermediaturs che la guerra saja definitivamain a fin. Quai ha ditg il pli aut manader da la Hamas en l’exteriur, Chalil al-Haja a la televisiun.
Il president american Donald Trump ha numnà la cunvegna in emprim pass «vers ina pasch ferma, durabla e perpetna». Tut las partidas vegnian tractadas fair, ha el scrit sin sia plattafurma «Truth Social».
Liberar ostagis e praschuniers
La cunvegna prevesa che tut ils 48 ostagis israelians vegnan libers aifer 72 uras u che lur baras vegnian transferidas en lur patria, che radund 2'000 praschuniers palestinais vegnian laschads libers e che l’Israel sa retira sin ina lingia definida.
Il secretari general da l’ONU, Antonio Guterres ha ditg: «Nus tuts avain gia spetgà bler memia ditg sin quest mument. Uss stuain nus dumagnar ch’el valia quella giada propi.»